გულის იშემიური დაავადების პრევენცია კავკასიის მედიცინის ცენტრში

გულის იშემიური დაავადება საქართველოში, ისევე როგორც მთელ მსოფლიოში პირველ ადგილზეა კარდიოლოგიურ პათოლოგიებს შორის, გავრცელების, ავადობისა და სიკვდილიანობის მიზეზის მიხედვით. დაავადების დროს ირღვევა კორონარული არტერიების სისხლგამტარობა და გულს არ მიეწოდება საკმარისი რაოდენობის სისხლი, რაც ხელს უშლის გულის კუნთის ინტენსიურ მუშაობას.  კავკასიის მედიცინის ცენტრის კარდიოლოგიური სამსახური აქტიურადაა ჩართული იშემიური დაავადების პრევენციაში და ამ მიზნით გვთავაზობს მრავალმხრივ, კვალიფიციურ სამედიცინო მომსახურებას.

 კარდიოლოგიის სამსახური წარმოადგენს მულტიფუნქციურ ცენტრს, რომლის პრიორიტეტი გულის დაავადებების განვითარების პრევენციაა, რისთვისაც კლინიკაში ზუსტად და კვალიფიციურად ისაზღვრება პაციენტის რისკ-ჯგუფი, რაც მოიცავს: სხვადასხვა სახის რისკ-ფაქტორების ერთობლიობას, თანმხლები დაავადებებისა და მავნე ჩვევების არსებობას. სწორედ მათი კონტროლი და ადეკვატური მკურნალობა იძლევა დაავადების თავიდან არიდების შესაძლებლობას.

ვინაიდან ინდივიდის განათლებას, კარდიოლოგიური პათოლოგიის პრევენციის მიმართულებით, განსაკუთრებული გავლენა აქვს დაავადების დადებით გამოსავალზე, განყოფილება პაციენტებს აწვდის ზუსტ ინფორმაციას მათი ჯანმრთელობის მდგომარეობისა და სტატუსის შესახებ და ქმნის კვლევებისა და მკურნალობის ინდივიდუალურ სქემებს საერთაშორისოდ აღიარებული გაიდლაინების მიხედვით.

გულის იშემიური დაავადების სადიაგნოსტიკოდ ჰოსპიტალში გამოიყენება არაინვაზიური და ინვაზიური გამოკვლევის მეთოდები, კერძოდ:

• ელექტროკარდიოგრაფია;
• ექოკარდიოგრაფია;
• სტრეს-ტესტი;
• ჰოლტერის მონიტორინგი;
• კომპიუტერული ტომოგრაფია;
• ინვაზიური კორონაროგრაფია.

კავკასიის მედიცინის ცენტრის კარდიოლოგიური განყოფილება დაკომპლექტებულია მაღალკვალიფიციური, დასავლური გამოცდილების მქონდე გუნდით, რომელიც აქტიურადაა ჩართული საერთაშორისო სამეცნიერო კონფერენციებში. გუნდის ხელმძღვანელი კი მედიცინის აკადემიური დოქტორი, კარდიოლოგი - სოფიო წიქარიშვილია.