ფარისებრი ჯირკვლის კიბოს მართვის პროგრამა კავკასიის მედიცინის ცენტრში

კავკასიის მედიცინის ცენტრი აქტიურადაა ჩართული ფარისებრი ჯირკვლის კიბოს გამოვლენის უფასო სახელმწიფო პროგრამაში და თბილისში რეგისტრირებულ 25-დან 60 წლამდე ასაკის პაციენტებს პროგრამის ფარგლებში სთავაზობს:

• ფარისებრი ჯირკვლის ულტრაბგერით კვლევას;
• წარმონაქმნის აღმოჩენის შემთხვევაში - ენდოკრინოლოგის კონსულტაციას;
• ენდოკრინოლოგის მიერ კვანძების სტრუქტურის შეფასების შემდეგ, საჭიროებისამებრ - თირეოტროპული ჰორმონის განსაზღვრასა და წარმონაქმნის ბიოფსიას;
• თუ ბიოფსიის ჩატარება იმ ეტაპზე ჩვენებას არ წარმოადგენს, სრულდება გამოკვლევა და ექიმის გადაწყვეტილებით პაციენტი გეგმიურ ვიზიტზე შეიძლება დაბარებული იყოს სამ, ექვს ან თორმეტ თვეში.

სკრინინგის მიზანი დაავადების ადრეულ სტადიაზე გამოვლენა და შემდგომ მისი ეფექტური მკურნალობაა. კავკასიის მედიცინის ცენტრის ენდოკრინოლოგიური სერვისის ხელმძღვანლის - ნინო თედორაძის თქმით, აღნიშნული პროგრამის ფარგლებში ბევრ უსიმპტომო პაციენტს დაუდასტურდა ავთვისებიანი სიმსივნე, ადრეული დიაგნოსტიკის წყალობით კი, ჩატარებულმა მკურნალობამ უმეტესი მათგანი დაავადებისგან სრულად განკურნა.

ჰოსპიტლის სკრინინგ-ცენტრის დირექტორი მედიცინის აკადემიური დოქტორი და რადიოლოგი, ეკატერინე შველიძეა.